Fréttir - Sjóvá - Gerum tryggingar betri

Fréttir frá Kauphöllinni / 12. jan. 2021

Sjóvá: Upplýsingar í aðdraganda ársuppgjörs

Drög að uppgjöri fjórða ársfjórðungs 2020 liggja fyrir og samkvæmt þeim mun afkoma fyrir skatta vera um 3.000 m.kr. og samsett hlutfall á fjórðungnum um 90%. Afkoma fyrir skatta á árinu 2020 mun samkvæmt þessu vera um 5.900 m.kr. og samsett hlutfall um 92%. Samsett hlutfall er í takt við birtar horfur en afkoma af fjárfestingastarfsemi miklu betri sökum jákvæðrar þróunar á hlutabréfamarkaði á fjórða ársfjórðungi. Áréttað skal að uppgjörið er enn í vinnslu og endurskoðun ekki lokið og kann því að taka breytingum fram að birtingardegi þann 11. febrúar nk.

Nánari upplýsingar veitir Sigríður Vala Halldórsdóttir, fjárfestatengill, í síma 844-2136 eða fjarfestar@sjova.is

Fréttir frá Kauphöllinni / 8. jan. 2021

Sjóvá: Tilnefningarnefnd Sjóvár auglýsir eftir framboðum til stjórnar

Tilnefningarnefnd Sjóvár auglýsir eftir framboðum og tilnefningum til stjórnar Sjóvár vegna aðalfundar félagsins sem haldinn verður föstudaginn 12. mars 2021.

Frestur til að skila inn framboðum og tilnefningum sem hljóta eiga umfjöllun tilnefningarnefndar er til loka þriðjudagsins 2. febrúar 2021. Tilkynning um framboð skal vera á sérstöku eyðublaði sem hægt er að nálgast á vefsvæði félagsins á slóðinni https://www.sjova.is/json/Eydublod/EYB-0208/frambod-stjornarsetu.pdf og skal skila á netfangið tilnefningarnefnd@sjova.is.

Tillaga nefndarinnar að tilnefningu frambjóðenda til stjórnarsetu verður kynnt samhliða aðalfundarboði sem birt verður skemmst þremur vikum fyrir aðalfund.

Almennur framboðsfrestur til stjórnar er fimm sólarhringum fyrir aðalfund. Starfsemi tilnefningarnefndar takmarkar ekki heimild frambjóðenda til að skila inn framboðum til stjórnar fram að því tímamarki, en um þau framboð verður ekki fjallað í tillögu tilnefningarnefndar. Nefndin áskilur sér þó rétt til að endurskoða tillögu þá sem birt verður samhliða aðalfundarboði og verður endurskoðuð tillaga þá birt a.m.k. tveimur dögum fyrir aðalfund.

Fréttir frá Kauphöllinni / 21. des. 2020

Sjóvá - Fjárhagsdagatal 2021

Stefnt er að birtingu árshluta- og ársuppgjöra Sjóvá-Almennra trygginga hf. á neðangreindum dögum:

4. ársfjórðungur 2020 – 11. febrúar 2021
Aðalfundur árið 2021 – 12. mars 2021
1. ársfjórðungur 2021 – 12. maí 2021
2. ársfjórðungur 2021 – 19. ágúst 2021
3. ársfjórðungur 2021 – 28. október 2021
4. ársfjórðungur 2021 – 10. febrúar 2022
Aðalfundur árið 2022 – 11. mars 2022

Vinsamlegast athugið að dagsetningarnar eru birtar með fyrirvara um breytingar.

Fréttir frá Kauphöllinni / 25. nóv. 2020

Sjóvá: Niðurstöður hluthafafundar 25. nóvember 2020

Hluthafafundur Sjóvá-Almennra trygginga hf. var haldinn kl. 10:00 þann 25. nóvember 2020. Fundurinn var haldinn í fundarsölum F og G á Hilton Reykjavík Nordica að Suðurlandsbraut 2, Reykjavík, auk þess að vera sendur út rafrænt.

Eftirfarandi eru niðurstöður fundarins:

1. Ákvörðun um tillögu stjórnar um greiðslu arðs og meðferð hagnaðar á síðastliðnu reikningsári

Tillaga stjórnar um að ekki verði greiddur út arður vegna rekstrarársins 2019 og að hagnaður ársins 2019 komi til hækkunar á eigin fé félagsins var samþykkt.

2. Önnur mál löglega fram borin

Engin önnur mál voru tekin fyrir á fundinum.

Fréttir frá Kauphöllinni / 20. nóv. 2020

Sjóvá: Endanleg dagskrá, tillögur og fyrirkomulag hluthafafundar 25. nóvember

Hluthafafundur Sjóvá-Almennra trygginga hf. verður haldinn miðvikudaginn 25. nóvember 2020 kl. 10:00 í fundarsölum F og G á Hilton Reykjavík Nordica, Suðurlandsbraut 2, 108 Reykjavík.

Meðfylgjandi er endanleg dagskrá hluthafafundarins og þær tillögur sem lagðar verða fyrir fundinn. Dagskráin og tillagan er óbreytt frá því boðað var til fundarins þann 3. nóvember sl. þar sem engar kröfur um tiltekin mál eða tillögur bárust frá hluthöfum innan tilskilins frests sem var þann 15. nóvember 2020.

Fyrirkomulag hluthafafundar:
Fundurinn verður í fundarsölum F og G á Hilton Reykjavík Nordica, Suðurlandsbraut 2. Öllum ákvörðunum heilbrigðisráðherra um samkomutakmarkanir á grundvelli sóttvarnarlaga verður að sjálfsögðu framfylgt. Fundinum verður jafnframt streymt á slóðinni https://www.sjova.is/um-okkur/fjarfestar/hluthafafundur/hluthafafundur-2020/. Ekki verður boðið upp á möguleika á rafrænni þátttöku í fundinum.

Í ljósi samkomutakmarkana býðst hluthöfum að veita umboð til umboðsmanns um þátttöku á fundinum með fyrirmælum um hvernig atkvæði skuli greidd um þá tillögu sem til afgreiðslu er. Hefur Sjóvá fengið Grétar Dór Sigurðsson hrl. hjá Lögfræðistofu Reykjavíkur til að vera umboðsmann fyrir þá hluthafa sem það vilja. Hægt er að sækja viðeigandi umboðseyðublað á vefsvæði Sjóvá og senda rafrænt á gretar@lr.is. Nánari upplýsingar um umboð og skil þeirra er að finna á fyrrgreindu umboðseyðublaði á vefsvæði Sjóvá.

Hluthöfum gefst jafnframt kostur á að mæta á fundinn, en í ljósi gildandi samkomutakmarkana eru hluthafar þá beðnir um að láta vita um mætingu á fundinn á netfangið stjorn@sjova.is eigi síðar en í lok dags 23. nóvember nk. svo hægt sé að áætla fjölda fundarmanna og gera viðeigandi ráðstafanir.

Að öðru leyti er vísað til fyrra fundarboðs og upplýsinga um hluthafafundinn sem nálgast má á vefsvæði félagins https://www.sjova.is/um-okkur/fjarfestar/hluthafafundur/hluthafafundur-2020/

Viðhengi