Reiðhjóladagar Slysavarnafélagsins Landsbjargar og Sjóvár

Birt í: Almennar fréttir / 10. jún. 2013 / Fara aftur í fréttayfirlit
Reiðhjóladagar Slysavarnafélagsins Landsbjargar og Sjóvár

Slysavarnadeildir Slysavarnafélagsins Landsbjargar vítt og breitt um land og Sjóvá hafa að undanförnu heimsótt nemendur í sjötta bekk í fjölda grunnskóla til að fræða nemendur um mikilvægi þess að vera með rétt stillta reiðhjólahjálma. Í heimsóknunum fengu börnin leiðbeiningar um hvernig hjálmar sitja rétt og til að auka færni þeirra á reiðhjóli spreyttu þau sig á hjólaþraut sem var sett upp á skólalóðunum. Einnig voru hengd upp veggspjöld í skólunum þar sem sjá má rétta stillingu hjálma.

Skyldubúnaður reiðhjóla virðist vefjast fyrir mörgum og því voru einnig hengd upp veggspjöld þar sem farið var yfir réttan búnað reiðhjóla. Dæmi um skyldubúnað er t.d. ljós bæði að aftan og framan auk glitaugu og láss. Um þetta má fræðast nánar á vef Umferðarstofu. Þegar hjálmarnir höfðu verið stilltir svöruðu börnin léttum spurningum. Dregið var úr réttum lausnum og heppnir krakkar fengu hjólalása í verðlaun.

Hvers vegna fræðsla til 6. bekkjar?

Ástæðan fyrir því að börn í sjötta bekk voru valin sem markhópur er sú að það er sá aldurshópur sem notar reiðhjól mjög mikið og hefurafa öðlast allnokkuð sjálfstraust til þess að hjóla í umferðinni. Það er því mjög nauðsynlegt að brýna fyrir þessum hópiim mikilvægi þess að nota hjálm, ekki síst í ljósi þess að um þessar mundir leggur samfélagið mikla áherslu á aukna reiðhjólanotkun. Með bættum samgöngum reiðhjólafólks er fyrirséð að reiðhjólum muni fjölga í umferðinni á næstu árum. Það er því mikilvægt að efla hæfni og þekkingu barnanna og búa þau betur undir framtíðina. Sérfræðingar í forvörnum hjá Sjóvá og fulltrúar Slysavarnafélagsins Landsbjargar Slysavarnafélaginu Landsbjörg skipulögðu fræðsluna en framkvæmdin var í höndum slysavarnadeildanna.
 

Tíðni slysa og orsakir þeirra

Reiðhjól eru ekki skráningaskyld og því liggja ekki fyrir upplýsingar um fjölda reiðhjóla á landinu né heldur raunfjölda reiðhjólaslysa. Í apríl sl. kynnti þó Landspítalinn upplýsingar um komur vegna reiðhjólaslysa á árabilinu 2005-2010.  Alls slösuðust 3.426 á tímabilinu, flestir minnihátar. Flestir reyndust með áverka á handlegg og öxl (46,5%), mjaðmagrind eða fótlegg (26,6%). Um 15% höfðu áverka á höfði og 13% í andliti. Í 70% tilvika var um að ræða karlmenn, konur voru 30% slasaðra. Meirihluti slasaðra var á aldrinum 11-20 ára. Flest slys áttu sér stað á vorin og yfir sumarið. Þeir sem ekki voru ekki með hjálm voru oftar með áverka á höfði og þeir einstaklingar voru oftar lagðir á sjúkrahús en aðrir slasaðir. Algengustu slysin verða við samstuð eða þegar ekið er á hjólandi.  Oft er því um að kenna að hjólreiðamaður er á of mikilli ferð og getur því ekki stöðvað í tæka tíð eða hann verður, af einhverjum orsökum, ekki var við aðra  í umferðinni.  

Alvarlegustu reiðhjólaslysin eru höfuðáverkar og er því til mikils að vinna sé unnt að fækka slíkum slysum. Þar skiptir hjálmurinn höfuðmáli.

SJ-WSEXTERNAL-2