Tjón af völdum vetrarblæðinga í slitlagi

Birt í: Almennar fréttir / 24. jan. 2013 / Fara aftur í fréttayfirlit

Eins og komið hefur fram í fjölmiðlum hefur að undanförnu orðið vart við talsverðar vetrarblæðingar á Vestur- og Norðurlandi, einkum í Húnavatnssýslum vestan Blönduóss. Þó að atvik sem þessi séu ekki algeng hafa vetrarblæðingar þekkst um langt skeið. Ástandið sem skapaðist um og eftir sl. helgi var hins vegar óvenju slæmt. Ekki er að fullu ljóst hvað valdið hefur þessum óvenjulegu blæðingum. Þó virðist sem um samspil margra ólíkra þátta sé að ræða.

Sjóvá og Vegagerðin hafa komist að sameiginlegri niðurstöðu um að bæta tjón á ökutækjum, sem sannanlega má rekja til framangreindra blæðinga dagana 18. - 23. janúar sl. Eins og áður segir er ákvörðun þessi tekin þrátt fyrir að orsök blæðinganna liggi ekki nákvæmlega fyrir. Ákvörðunin byggir á því að Vegagerðin hefði í þessu tilviki mögulega mátt bregðast fyrr við þeim aðstæðum sem voru uppi.
 
Vegfarendum, sem orðið hafa fyrir tjóni á ökutækjum sínum af völdum þessara blæðinga á áðurnefndu tímabili, er bent á að hafa samband við Sjóvá og fylla út tjónaskýrslu. Nánari upplýsingar eða aðstoð er hægt að nálgast hjá þjónustuveri Sjóvár í síma 440 2000.

Jafnframt býður Vegagerðin ökumönnum verulega óhreinna ökutækja af völdum tjörunnar að fá beiðni fyrir þrifum á næstu starfsstöð Vegagerðarinnar. Nánari upplýsingar um hvar starfstöðvar er að finna gefur Vegagerðin í síma 522-1000.

Sjóvá hvetur ökumenn til þess að gæta fyllstu varúðar og haga akstri ávallt í samræmi við aðstæður hverju sinni.

SJ-WSEXTERNAL-3