Bændatryggingar

Engin tvö bú eru eins. Tryggingaþörfin ræðst meðal annars af bústofni, húsakosti, vélum og tækjum sem tilheyra búinu, fjölda starfsmanna og því hvernig starfsemin er skipulögð. 

Mikilvægt er að láta yfirfara tryggingarnar reglulega og þá sérstaklega ef breytingar verða á rekstrinum, til dæmis við kaup á nýjum vélum eða búnaði, þegar bústofn stækkar eða ráðist er í framkvæmdir. 

Rekstrarstöðvunartrygging getur dregið úr fjárhagslegum áhrifum ef bótaskylt tjón stöðvar starfsemi búsins eða raskar henni verulega. Verndin getur meðal annars tekið til nauðsynlegs aukakostnaðar, fastra útgjalda og, eftir því hvaða vernd er valin, tapaðrar afkomu á meðan viðgerðir standa yfir. Miðaðu umfang tryggingarinnar við mögulegan stöðvunartíma og þann kostnað sem heldur áfram að falla til.

Ábyrgðartrygging atvinnurekstrar getur komið til álita ef skaðabótakrafa er gerð á hendur bónda vegna líkamstjóns eða tjóns á eignum annarra sem rekja má til starfsemi búsins. Tryggingarfjárhæð og umfang þurfa að taka mið af starfseminni, meðal annars húsnæði, þjónustu og vörum sem búið framleiðir eða selur. Tryggingin er ekki lögboðin og takmarkanir geta gilt, til dæmis um muni sem eru að láni, leigu eða í vörslu bóndans. Kynntu þér því skilmála og undantekningar.

Öll hús sem tilheyra jörðinni, svo sem íbúðarhús, fjós, fjárhús, hesthús, hlöður og vélageymslur, þurfa að vera brunatryggð samkvæmt lögum. Brunatryggingin nær þó ekki til allra tjóna. Því getur verið skynsamlegt að bæta við fasteignatryggingu fyrir íbúðarhús og meta hvort þörf sé á sérstakri vernd fyrir útihús, til dæmis vegna foks. 

Mikilvægt er að tryggingavernd og tryggingarfjárhæðir endurspegli húsakostinn eins og hann er hverju sinni. Eigendur geta skoðað skráð fasteignamat og brunabótamat eigna sinna á Mínum síðum á Ísland.is eða í Fasteignaskrá HMS. Eftir nýbyggingu, viðbyggingu eða umfangsmiklar endurbætur umfram hefðbundið viðhald getur verið ástæða til að óska eftir endurmati. Brunabótamat á að endurspegla áætlaðan kostnað við að endurbyggja eignina eftir altjón, en fasteignamat er mat á virði húss og lóðar. Nánari upplýsingar og rafrænar umsóknir um endurmat má finna á Ísland.is

Skráningarskyld ökutæki, þar á meðal dráttarvélar, þurfa lögboðna ökutækjatryggingu. Hálfkaskótrygging getur meðal annars bætt tjón við veltu á dráttarvél og fasttengdum landbúnaðartækjum. Aðrar vélar, áhöld og tæki geta fallið undir lausafjártryggingu, en fyrir verðmætari búnað getur verið rétt að skoða kaskó- eða húftryggingu. Skráðu helstu vélar, notkun þeirra og verðmæti áður en þú ferð yfir verndina með ráðgjafa.

Veikindi, slys eða fráfall geta haft mikil áhrif á afkomu fjölskyldunnar og rekstur búsins. Líf-, sjúkra- og slysatryggingar geta veitt fjárhagslegt svigrúm vegna tekjumissis, skertrar starfsgetu eða óvæntra útgjalda. Farðu yfir verndina með hliðsjón af fjölskylduaðstæðum, skuldum og því hversu háður reksturinn er vinnuframlagi einstakra aðila.

Fáðu betri yfirsýn yfir verðmæti búsins 

Taktu saman bústofn, fóður, vélar, tæki og helstu fasteignabreytingar áður en þú ferð yfir tryggingarnar. Þá er auðveldara að sjá hvort tryggingarfjárhæðir og vernd endurspegla reksturinn eins og hann er í dag. 

Reikniskjal fyrir bændur 

Með reikniskjalinu geturðu tekið saman fjölda og áætlað verðmæti nautgripa, sauðfjár, hrossa og fóðurs. 

Heildarverðmæti reiknast sjálfkrafa og niðurstöðurnar geta nýst sem grunnur að samtali við ráðgjafa. Reikniskjalið er leiðbeinandi og felur ekki í sér staðfest tryggingamat, tilboð eða staðfestingu á tryggingavernd.

Öruggara bú minni líkur á tjóni 

Landbúnaðarstörfum fylgir áhætta vegna meðal annars vinnuvéla, dýra, rafbúnaðar og hættulegra lofttegunda. Skýrt verklag, reglulegt eftirlit og góð fræðsla hjálpa bændum að greina hættur, bregðast rétt við og vernda fólk, dýr og verðmæti búsins. 

Brunavarnir í útihúsum 

Bruni í útihúsum getur haft alvarleg áhrif á fólk, dýr og rekstur búsins. 

Slökkvitæki eiga að vera aðgengileg og yfirfarin, flóttaleiðir greiðar og allir á búinu þurfa að þekkja rétt viðbrögð við eldi. 

Geyma þarf hey, eldsneyti og önnur eldfim efni á öruggan hátt og halda vélum og rafbúnaði hreinum. Slökkvitæki á vinnuvél getur komið í veg fyrir stórtjón. 

Rafmagnsöryggi í útihúsum 

Ryk, raki og mikið álag geta valdið bilunum og aukið eldhættu í rafbúnaði. Bregðast þarf strax við brunalykt, neistamyndun, skemmdum köplum eða óeðlilegum hita. 

Rafmagnstöflur eiga að vera lokaðar, skýrt merktar, hreinar og aðgengilegar. Fáðu löggiltan rafverktaka til að yfirfara raflagnir og búnað reglulega og ganga úr skugga um að rafbúnaður henti aðstæðum í hverju rými. 

Öryggi vinnuvéla 

Vinnuvélar þurfa að vera í góðu ástandi og allur öryggisbúnaður rétt uppsettur og notaður samkvæmt leiðbeiningum framleiðanda. 

Áður en hreinsun, viðhald eða viðgerð hefst skal stöðva vélina og tryggja að hún geti ekki farið óvænt í gang. Aðeins þeir sem hafa til þess þekkingu og hæfni eiga að stjórna vélum og halda skal börnum og óviðkomandi frá vinnusvæðinu. 

Nýjar vinnuvélar eiga að vera CE-merktar og þeim að fylgja notkunar- og öryggisleiðbeiningar á íslensku. Eldri vélar þurfa einnig að uppfylla gildandi öryggiskröfur. 

Gasmengun í fjósum og fjárhúsum 

Þegar hrært er í haughúsum geta losnað hættulegar lofttegundir. Lykt er ekki örugg vísbending um hvort svæðið sé hættulaust og því er mikilvægt að treysta ekki á lyktarskynið eitt og sér.  

Áður en vinna hefst þarf að tryggja góða loftræstingu og halda fólki og dýrum frá hættusvæðinu. Enginn ætti að vinna einn við hrærslu eða dælingu. Nota skal viðeigandi gasmæli þar sem hætta getur skapast. 

Ekki má fara ofan í haughús eða annað lokað rými án sérhæfðs búnaðar, þjálfunar og viðurkennds verklags. Ef grunur vaknar um gasmengun skal yfirgefa svæðið og hringja strax í 112. 

Farðu yfir helstu öryggisatriði á búinu með einföldum og aðgengilegum gátlista. 

Listinn nær meðal annars yfir: 

• brunavarnir í útihúsum
• rafmagnsöryggi
• vinnuvélar og tæki
• gasmengun og haughús
• neyðarviðbrögð
• verðmæti og tryggingar.

Þú getur merkt við það sem er í lagi, skráð það sem þarf að laga og tilgreint ábyrgð og skilafrest fyrir úrbætur.