Bændatryggingar

Engin tvö bú eru eins. Þarfirnar ráðast meðal annars af búgrein, umfangi rekstrarins, húsakosti, bústofni og þeim vélum og tækjum sem eru í notkun. 

Við hjálpum þér að fara yfir helstu verðmæti búsins og finna tryggingar sem henta rekstrinum. Regluleg yfirferð er sérstaklega mikilvæg þegar bústofn breytist, nýr búnaður er keyptur eða farið er í framkvæmdir á húsnæði. 

Fáðu betri yfirsýn yfir verðmæti búsins 

Verðmæti bús geta breyst þegar bústofn stækkar, ný tæki eru keypt eða farið er í framkvæmdir. Með einföldum verkfærum geturðu undirbúið yfirferð á tryggingaverndinni og fengið betri yfirsýn yfir þær eignir sem reksturinn byggir á. 

Reikniskjal fyrir bændur 

Með reikniskjalinu geturðu tekið saman fjölda og áætlað verðmæti nautgripa, sauðfjár, hrossa og fóðurs. 

Heildarverðmæti reiknast sjálfkrafa og niðurstöðurnar geta nýst sem grunnur að samtali við ráðgjafa. Reikniskjalið er leiðbeinandi og felur ekki í sér staðfest tryggingamat, tilboð eða staðfestingu á tryggingavernd. 

Besta tjónið er það sem aldrei verður 

Landbúnaðarstörf geta falið í sér verulega áhættu, meðal annars vegna vinnuvéla, dýra, rafbúnaðar og hættulegra lofttegunda. Skýrt verklag, regluleg yfirferð og góð fræðsla geta aukið öryggi fólks og dýra og dregið úr hættu á tjóni. Þörf fyrir aukna fræðslu og markvissari forvarnir kom skýrt fram í vinnu Sjóvá með bændum.

Gasmengun í fjósum og haughúsum 

Við hrærslu og dælingu úr haughúsum geta losnað hættulegar lofttegundir. Lykt er ekki örugg vísbending um hvort svæðið sé hættulaust og því er mikilvægt að treysta ekki á lyktarskynið eitt og sér.

Áður en vinna hefst þarf að tryggja góða loftræstingu og halda fólki og dýrum frá hættusvæðinu. Enginn ætti að vinna einn við hrærslu eða dælingu og nota skal viðeigandi gasmæli þar sem hætta getur skapast. 

Ekki má fara ofan í haughús eða annað lokað rými án sérhæfðs búnaðar, þjálfunar og viðurkennds verklags. Ef grunur vaknar um gasmengun skal yfirgefa svæðið og hringja í 112.

Brunavarnir í útihúsum 

Bruni í fjósi, fjárhúsi, hlöðu eða vélaskemmu getur haft víðtæk áhrif á fólk, dýr og rekstur. 

Slökkvitæki þurfa að vera aðgengileg og yfirfarin. Flóttaleiðir fyrir fólk og dýr þurfa að vera greiðar og allir sem vinna á búinu þurfa að vita hvernig bregðast skal við eldi. 

Geyma þarf hey, eldsneyti og önnur eldfim efni með öruggum hætti og halda vélum og rafbúnaði hreinum af ryki, heyi og óhreinindum. Slökkvitæki á dráttarvél eða annarri vinnuvél getur komið í veg fyrir að lítið atvik verði að stórtjóni.

Rafmagnsöryggi á bújörðum 

Ryk, raki og mikið álag geta haft áhrif á rafbúnað í útihúsum. Bregðast þarf strax við brunalykt, neistamyndun, skemmdum köplum eða óeðlilegum hita í rafbúnaði. 

Rafmagnstöflur þurfa að vera lokaðar, merktar, hreinar og aðgengilegar. Láta skal fagaðila yfirfara raflagnir og búnað eftir þörfum og tryggja að rafbúnaður henti þeim aðstæðum sem eru í viðkomandi rými. 

Öryggi vinnuvéla

Vinnuvélar þurfa að vera í góðu ástandi og nota skal hlífar, skynjara og annan öryggisbúnað samkvæmt leiðbeiningum framleiðanda.

Stöðva þarf vél og tryggja að hún geti ekki farið óvænt í gang áður en hreinsun, viðhald eða viðgerð hefst. Aðeins þeir sem hafa viðeigandi þekkingu og hæfni eiga að stjórna vélum og börn og óviðkomandi eiga ekki að vera á vinnusvæði.

Nýjar vinnuvélar eiga að vera CE-merktar og þeim eiga að fylgja notkunar- og öryggisleiðbeiningar á íslensku. Eldri vélar eiga að vera jafn öruggar og nýjar.

Forvarnagátlisti fyrir búið 

Farðu yfir helstu öryggisatriði á búinu með einföldum og aðgengilegum gátlista. 

Listinn nær meðal annars yfir: 

• gasmengun og haughús 
• brunavarnir í útihúsum 
• rafmagnsöryggi 
• vinnuvélar og tæki 
• neyðarviðbrögð 
• verðmæti og tryggingar. 

Þú getur merkt við það sem er í lagi, skráð það sem þarf að laga og tilgreint ábyrgð og skilafrest fyrir úrbætur.