Almenn slysatrygging greiði bætur vegna afleiðinga slysa.

Þú getur valið þá bótaþætti sem henta þér og þínum aðstæðum þegar þú sækir um trygginguna.

Bótaþættirnir sem eru í boði eru:

• Dánarbætur vegna slyss: Ef slys veldur dauða innan árs frá slysadegi fá rétthafarnir sem þú tilnefndir greiddar skattfrjálsar dánarbætur. Við mælum þó frekar með að þú kaupir líftryggingu.
• Örorkubætur vegna slyss: Ef þú lendir í slysi og nærð ekki fullum bata færðu greiddar örorkubætur. Þú ákveður vátryggingarfjárhæðina og mat á læknisfræðilegri örorku ræður því hversu hátt hlutfall þeirrar fjárhæðar er greitt til þín. Það þýðir að ef læknisfræðileg örorka þín er metin 50% er helmingur vátryggingarfjárhæðarinnar greiddur þér í einu lagi. Þú þarft ekki að greiða tekjuskatt af þeim bótum.
• Dagpeningar vegna slyss: Slys getur valdið óvinnufærni til skemmri tíma. Dagpeningar eru greiðslur sem greiddar eru þegar slíkt gerist. Greiðslur dagpeninga hefjast þegar umsaminn biðtími er liðinn og eru greiddar á meðan óvinnufærni varir, þó ekki lengur en sem nemur umsömdum bótatíma, sem kemur fram á skírteini tryggingarinnar. Greiða þarf tekjuskatt af dagpeningum.
• Örorkubætur vegna veikinda: Ef veikindi valda varanlegri læknisfræðilegri örorku sem er metin 25% eða hærri færðu greiddar örorkubætur. Að öðru leyti gildir það sama og um örorkubætur vegna slyss.
• Dagpeningar vegna veikinda: Ef þú verður óvinnufær tímabundið vegna veikinda færðu greidda dagpeninga. Óvinnufærni þarf að ná 50% og greiðast dagpeningar í hlutfalli við óvinnufærnina. Að örðu leyti gildir það sama og um dagpeninga vegna slyss.

Hægt er að innifela til dæmis keppnisíþróttir, aksturs- og bardagaíþróttir, fjalla- og klettaklifur, bjargsig, froskköfun, dreka- og svifflug, fallhlífarstökk og aðrar sambærilegar og eðlisskyldar íþróttir. Þá er greitt sérstakt iðgjald fyrir þá viðbót.

Ýmsir þættir hafa áhrif á verðið sem þú greiðir fyrir trygginguna.

Það hversu háar bætur þú velur að fá úr tryggingunni ef til tjóns kemur hefur til dæmis mikil áhrif á verðið; því hærri bætur, því meira kostar tryggingin.

Það hversu langur biðtími er eftir dagpeningum og hversu langur bótatími dagpeninga er hefur líka áhrif.

Ef þú stundar áhættumeiri störf og kaupir slysatryggingu sem gildir í vinnutíma þarftu að greiða meira en þau sem stunda áhættuminni störf.

Ef þú innifelur keppnisíþróttir eða sérstaka áhættusama frístundaiðju þá hækkar iðgjald slysatryggingarinnar.

Bótum úr slysatryggingu er ætlað að bæta tekjutap, hvort sem það er til langs tíma eða skamms tíma. Bæturnar eiga því að taka mið af launum þínum.

Algengt er að fólk velji að dagpeningar jafngildi 75% af mánaðarlaunum og örorkubætur séu um þreföld til fimmföld árslaun.

Biðtími dagpeninga er sá tími sem líður frá slysi þar til dagpeningagreiðslur hefjast. Þú velur hvað þú vilt hafa biðtíman langan og hefur þá til hliðsjónar önnur réttindi þín, eins og veikindarétt og rétt á dagpeningum frá sjúkrasjóði. Algengt er að biðtími sé um 4 til 12 vikur.

Bótatími dagpeninga er sá tími sem þú getur að hámarki fengið greidda dagpeninga. Þú velur hvað þú vilt hafa bótatíman langan og hefur þá líka í huga önnur réttindi þín. Algengt er að fólk velji að bótatími sé á bilinu 1 til 3 ár, en hámarkið er 5 ár.