Sjálf­bærni

Sjóvá leggur sig fram um að draga úr umhverfisáhrifum starfseminnar með markvissum aðgerðum og ábyrgri nýtingu auðlinda.

Við höfum unnið að minnkun losunar frá starfseminni með fjölbreyttum hætti, m.a. með minnkun sóunar við afgreiðslu tjóna og með þróun á stafrænum þjónustulausnum, m.a. við tjónaskoðanir.

Við höfum verið með samning við Kolvið frá 2015 um kolefnisbindingu með skógrækt vegna losunar frá starfseminni og höfum einnig keypt kolefniseiningar frá Kötlu Carbon sem vinnur að forðun losunar með menntaverkefnum fyrir stúlkur í Afríku.

Áhættustýring

Helstu áhættuþættir á sviði tryggingastarfsemi og umhverfisþátta tengdum loftslagsáhættu snúa að vátryggðum áhættum og endurtryggingum. Lagt er mat á ytri áhættur félagsins ársfjórðungslega og er eigið áhættumat framkvæmt að lágmarki árlega, sem meðal annars felur í sér mat á loftslagsáhættu í rekstri félagsins.

Á hverju ári er gengið frá samningum við endurtryggjendur og geta áhættur sem snúa að loftslagsbreytingum og afleiðingum þeirra, sem og aðrar áhættur á alþjóðavettvangi eins og stríðsrekstur og staða stjórn- og efnahagsmála á heimsvísu, haft áhrif á umfang og kostnað við endurtryggingar. Stjórnir og stjórnendur auk sérfræðinga annast þetta mat fyrir reksturinn.

Helstu áhættuþættir vegna loftslagsáhættu snúa að breytingum á veðurfari og afleiddum áhættum, svo sem vegna aukinnar hættu á gróðureldum en einnig vegna afleiddra áhætta í kjölfar skriðufalla og flóða. Við þarfagreiningu og í samningagerð við endurtryggjendur er litið til tjónareynslu í tengslum við stóra veðuratburði og fylgst með þróun breytinga á veðurfari.

Þó ekki fari fram formlegt UFS áhættumatsferli við tryggingatöku er litið til loftslagsáhættu í áhættumati þar sem við á. Áhættumat í tengslum við endurtryggingar tekur einnig mið af loftslagsáhættu.

Til takmörkunar á áhættu tryggingafélaga á Íslandi kemur að þau bera ekki áhættu af völdum náttúruhamfara þar sem Náttúruhamfaratrygging Íslands, sem starfar skv. lögum nr. 55/1992, hefur það hlutverk að vátryggja eignir gegn tjóni af völdum náttúruhamfara, þ.e. eldgosa, jarðskjálfta, skriðufalla, snjóflóða og vatnsflóða á Íslandi. Sjóvá innheimtir iðgjöld fyrir hönd stofnunarinnar af brunatryggðum húseignum og lausafé viðskiptavina sinna.

Við höfum lengi haft ánægju viðskiptavina að leiðarljósi og lagt áherslu á að veita framúrskarandi þjónustu, hvort sem það er við sölu, ráðgjöf, tjónaþjónustu eða annað.

Við vinnum stöðugt að því að bæta þjónustuna og höfum náð góðum árangri í þeim efnum, meðal annars verið efst tryggingafélaga í Íslensku ánægjuvoginni síðustu 9 árin.

Áhættustýring

Sjóvá á, líkt og öll þjónustufyrirtæki, mikið undir því að viðskiptavinir séu ánægðir með þjónustuna og upplifi félagið með jákvæðum hætti. Helstu áhættur þessu tengt snúa að gæðum sambandsins á milli félagsins og hagaðila og að orðspori félagsins. Því er vel fylgst með öllum mælikvörðum sem tengjast ánægju viðskiptavina og unnið markvisst að því að bæta ráðgjöf og þjónustu.

Rík áhersla er lögð á að tryggja rétta og skýra upplýsingagjöf og ráðgjöf um vörur til viðskiptavina. Þannig stuðlar markviss fræðsla að því að starfsfólk búi yfir góðri þekkingu og geti miðlað henni með fjölbreyttum leiðum og haft þannig jákvæð áhrif á viðskiptavini og samfélag. Góð og skilvirk úrvinnsla ábendinga og kvartana er einnig mikilvægur þáttur í að stuðla að betri þjónustu.

Frá upphafi höfum við lagt ríka áherslu á öflugt forvarnastarf og fræðslu, bæði til einstaklinga og fyrirtækja, en þar liggja stærstu tækifæri okkar til áhrifa í sjálfbærnimálum. Það er allra hagur að koma í veg fyrir áföll, slys og tjón, stuðla þannig að auknu heilbrgiði og öryggi fólks og koma um leið í veg fyrir sóun.

Við nýtum gögn sem við höfum aðgang að til að greina þróun tjóna og móta áherslur og skilaboð í forvörnum hverju sinni. Við eigum í öflugu samstarfi við ýmsa aðila sem vinna að öryggismálum, s.s. Samgöngustofu, Slysavarnafélagið Landsbjörgu og fleiri, um ýmis forvarnatengd verkefni. Þá eigum við í góðu samstarfi við fyrirtæki sem tryggja hjá okkur um forvarnir og öryggismál hjá þeim.

Áhættustýring

Helstu áhættur tengdar forvörnum snúa að því ef þeim er ekki sinnt sem skyldi. Ef við fylgjumst ekki nógu vel með þróun á áhættum hjá einstaklingum og fyrirtækjum og bregðumst þar af leiðandi ekki við með viðeigandi hætti skapast áhætta. Eins er ákveðin áskorun fólgin í því hversu erfitt er að mæla hverju forvarnarstarfið skilar hverju sinni. Forvarnir ná yfir afar víðfeðmt svið. Því er mikilvægt að forgangsraða áherslum, byggt á gögnum sem sýna hvar vandinn er brýnastur og hvar við getum haft mest áhrif.

Helstu tækifæri Sjóvár á sviði forvarna felast í enn betri nýtingu gagna og sífellt markvissari miðlun þekkingar. Virkt samtal við hagaðila er forsenda árangurs í forvörnum og því felast ótvíræð tækifæri í að efla það enn frekar.

Ánægja starfsfólks og ánægja viðskiptavina helst þétt í hendur. Öflugur mannauður sem býr yfir góðri þekkingu og fjölbreyttri reynslu er forsenda þess að við getum veitt viðskiptavinum okkar framúrskarandi þjónustu og þróað starfsemina í takt við þarfir þeirra.

Stefna Sjóvá í mannauðsmálum er að skapa eftirsóknarverðan vinnustað með hvetjandi starfsumhverfi þar sem starfsfólk fær tækifæri til að dafna og þróast í starfi. Mælingar sýna að starfsánægja hjá Sjóvá er með því hæsta sem gerist á landinu og var hún til dæmis 4,6 af 5 mögulegum í könnun Gallup í 2025.

Áhættustýring

Helstu áhættur tengdar mannauði snúa að starfsánægju, helgun, heilsu, þekkingu og tryggð starfsfólks. Aukin starfsmannavelta getur aukið líkurnar á að mikilvæg þekking glatist. Því er stöðugt unnið að því að viðhalda starfsánægju og viðhalda og auka þá þekkingu og færni sem starfsfólk býr yfir með öflugu og markvissu fræðslustarfi. Tryggja þarf að Sjóvá sé ávallt samkeppnishæft sem vinnustaður og geti laðað til sín framúrskarandi starfsfólk. Mikið er lagt upp úr að stuðla að bættri heilsu og velferð starfsfólks. Önnur áhætta tengd mannauði er ef að ekki næst að tryggja fjölbreytni starfsmannahópsins og hún nær ekki að endurspegla samfélagið sem skyldi. Rík áhersla er lögð á jafnréttismál hjá Sjóvá og fylgst með kynjahlutföllum og öðrum viðeigandi mælikvörðum.

Sjóvá fylgir í hvívetna þeim lögum og reglum sem um starfsemina gilda. Sjóvá einsetur sér að vera fyrirmyndarfyrirtæki í stjórnarháttum sem felur í sér að stjórnarhættir séu í samræmi við leiðbeiningar um stjórnarhætti og þær kröfur sem gerðar eru til félaga sem eru eftirlitsskyldir aðilar og skráð í kauphöll. Sjóvá uppfyllir lágmarksverndarráðstafanir í samræmi við ákvæði flokkunarreglugerðar Evrópusambandsins. Sjóvá hefur sett sér stefnur um upplýsingaöryggi og persónuvernd sem eiga að tryggja vernd upplýsinga, réttleika gagna, aðgengi og öryggi þeirra. Sjóvá leggur mikla áherslu á upplýsingaöryggi og fyrirbyggjandi aðgerðir í þeim efnum.