Ný vernd vegna varðveislu frjósemi eftir krabbameinsgreiningu
Sjóvá hefur bætt nýrri vernd við sjúkdómatryggingar sínar sem styður við viðskiptavini sem þurfa að gangast undir krabbameinsmeðferð sem getur haft skaðleg áhrif á frjósemi.
Sjóvá hefur bætt nýrri vernd við sjúkdómatryggingar sínar sem styður við viðskiptavini sem þurfa að gangast undir krabbameinsmeðferð sem getur haft skaðleg áhrif á frjósemi.
Nýja verndin, varðveisla á frjósemi, tók gildi 1. júlí 2026 og er ætluð einstaklingum með sjúkdómatryggingu hjá Sjóvá sem þurfa á lyfja- og/eða geislameðferð að halda vegna bótaskylds krabbameins. Ef meðferðin getur, að mati læknis, haft skaðleg áhrif á frjósemi getur verndin tekið til kostnaðar vegna frystingar á sæði, eggfrumum eða fósturvísum og geymslu þeirra í allt að þrjú ár.
„Þegar fólk greinist með krabbamein þarf oft að taka margar stórar ákvarðanir á skömmum tíma. Með þessari vernd viljum við létta undir með viðskiptavinum okkar á erfiðum tíma og styðja við þá sem vilja varðveita möguleika sína til barneigna síðar á lífsleiðinni,“ segir Steinunn Guðjónsdóttir framkvæmdastjóri Sjóvá Líftrygginga.
Verndin endurgreiðir útlagðan kostnað, að frádreginni greiðsluþátttöku frá Sjúkratryggingum Íslands og stéttarfélögum. Hámarksendurgreiðsla er 500.000 kr. fyrir hvern einstakling sem verndin tekur til. Verndin gildir fyrir vátryggða 50 ára og yngri og tekur einnig til barna vátryggðs yngri en 18 ára, ef þau þurfa að gangast undir slíka meðferð vegna bótaskylds krabbameins. Verndin er sjálfkrafa innifalin í öllum sjúkdómatryggingum okkar, viðskiptavinum að kostnaðarlausu og þurfa viðskiptavinir ekkert að aðhafast.
Samstarf við Kraft
Sjóvá kynnir verndina í samstarfi við Kraft, stuðningsfélag fyrir ungt fólk sem greinst hefur með krabbamein. Kraftur hefur um árabil unnið mikilvægt starf við að styðja ungt fólk sem greinist með krabbamein og vekja athygli á þeim áskorunum sem geta fylgt greiningu og meðferð.
Með samstarfinu vilja Sjóvá og Kraftur auka vitund um mikilvægi frjósemisvarðveislu og stuðla að því að fólk fái upplýsingar og stuðning þegar slíkar ákvarðanir þarf að taka.
„Það skiptir miklu máli að ungt fólk sem greinist með krabbamein fái upplýsingar um áhrif meðferðar á frjósemi og hvaða úrræði standa til boða. Við fögnum því að Sjóvá taki þátt í að vekja athygli á þessu mikilvæga málefni,“ segir Sólveig Ása Tryggvadóttir framkvæmdastjóri Krafts.
Með nýju verndinni vill Sjóvá styrkja sjúkdómatryggingar sínar enn frekar og mæta raunverulegum þörfum viðskiptavina þegar mikið liggur við.