Ábyrgðartrygging ökutækis tryggir þig fyrir tjóni sem þú veldur öðrum með notkun ökutækisins. Það á bæði við slys á fólki og tjón á munum.

Slysatrygging ökumanns og eiganda bætir slysatjón sem verður á þeim ökumanni sem veldur tjóninu og slysatjón á eiganda ökutækis.

Bílrúðutrygging bætir tjón á fram-, aftur og hliðarrúðum ökutækis. Þetta eru algeng tjón sem kosta sitt og því er bílrúðutrygging innifalin í ökutækjatryggingu.

Ef þú vilt ekki innifela bílrúðutryggingu í ökutækjatryggingunni biðjum við þig um að hafa samband við okkur á sjova@sjova.is eða í síma 440 2000.

Það hafa margir þættir áhrif á verðið. Notkun ökutækis, búseta, tjónasaga og aldur fjölskyldumeðlima eru til dæmis allt þættir sem geta haft áhrif. Ef þú kaupir viðauka, ef þú ætlar sem dæmi að nota ökutækið í aksturskeppni eða vilt leigja það út hluta ársins, þá hefur það líka áhrif á verðið.

Viðskiptavinir í Stofni fá afslátt af iðgjaldi tryggingarinnar og tjónlausir og skilvísir viðskiptavinir fá líka Stofnendurgreiðslu af iðgjaldi lögboðinnar ökutækjatryggingar fyrir einkabíla og mótorhjól.

Skráningarskyld ökutæki eru bílar, bifhjól, torfærutæki, dráttarvélar, eftirvagnar bíla eða dráttarvéla sem gerðir eru fyrir meira en 750 kg heildarþyngd, eins og hjólhýsi og tjaldvagn.

Þetta á þó ekki við um eftirvagna bifreiða á beltum eða dráttarvélar sem eru nær eingöngu notaðar utan opinberra vega.

Sjá nánar í reglugerð um skráningu ökutækja.

Athugið að það þarf ekki að tryggja eftirvagna (s.s. hjólhýsi og tjaldvagna) með lögboðinni ökutækjatryggingu, þó að þeir séu skráningarskyldir.

Þú byrjar á því að tilkynna um eigendaskipti ökutækis til Samgöngustofu.

Þú hefur síðan samband við okkur, við fellum niður trygginguna af gamla bílnum þínum og gefum út tryggingu fyrir nýja bílinn.

Þú þarft að fá staðfestingu frá seljanda um að iðgjald af ökutækinu sé greitt af tryggingunni sem hann var með á því. Ef ökutækið var tryggt hjá okkur getum við gefið kaupanda eða bílasölu upplýsingar um hvort iðgjaldaskuld sé á ökutækinu.

Ef iðgjalda skuld er skilin eftir á fyrri eiganda getur viðkomandi tryggingafélag krafið nýjan eiganda um greiðslur og á lögveð í ökutækinu, þrátt fyrir eigendaskipti, samkvæmt lögum um ökutækjatryggingar. Við hjá Sjóvá munum ekki nýta þessa lagaheimild gagnvart einstaklingum á meðan þeir geta ekki nálgast staðfestingu á að iðgjald ökutækjatryggingar sé greitt með einfaldari hætti en nú er. Við hvetjum þó öll sem kaupa notuð ökutæki til að fara fram á slíka staðfestingu frá seljanda.

Þegar farið er með ökutæki erlendis þarf að huga vel að tryggingum.

Ökutækjatrygging gildir á Íslandi og í öðrum aðildarríkjum Evrópska efnahagssvæðisins (EES) og í Sviss. Hægt er sækja um svokallað Grænt kort sem er staðfesting á því að ábyrgðartrygging (sem er hluti af lögboðinni ökutækjatryggingu) sé í gildi á ökutækinu.

Fleiri lönd en aðildarríki EES og Sviss eiga aðild að samstarfinu Græna kortið. Hér geturðu séð hvaða lönd eiga aðild að samstarfinu.

Til að fá Græna kortið hefurðu samband við okkur á netspjallinu, í s. 440 2000 eða á sjova@sjova.is. Ekki þarf að greiða fyrir Græna kortið. 

Sjá nánar um akstur erlendis.