Fljúgandi Stofnendurgreiðsla í formi Vildarpunkta Icelandair

Tjónlausir viðskiptavinir í Stofni hjá Sjóvá geta fengið endurgreiðslu einu sinni á ári og ef þeir eru jafnframt félagar í Icelandair Saga Club er hægt að fá endurgreiðsluna í formi vildarpunkta sem nýtast til ferðalaga og annarra fríðinda hjá Icelandair. Þegar vildarpunktar Icelandair eru valdir sem stofnendurgreiðsla Sjóvá skrá viðskiptavinir sig inn í Sjóvá appið eða á Mitt Sjóvá og velja að fá endurgreiðsluna í formi vildarpunkta Icelandair. Þegar viðskiptavinir í Stofni velja að fá endurgreiðslu í formi vildarpunkta eru punktarnir skráðir um leið á Saga Club reikninginn hjá Icelandair. Dæmi: Fyrir hverjar 15.000 kr. í Stofnendurgreiðslu frá Sjóva fást 25.000 Vildarpunktar Icelandair. 

„Við leitum stöðugt leiða til að skapa viðskiptavinum okkar meira virði. Með samstarfinu við Icelandair geta viðskiptavinir í Stofni nýtt endurgreiðsluna sína á nýjan og spennandi hátt sem tengist upplifunum og ferðalögum,“ segir Svali Björgvinsson, framkvæmdastjóri markaðsmála og viðskiptaþróunar hjá Sjóvá. 

Ekkert lágmark er á þeirri fjárhæð sem hægt er að skipta í Vildarpunkta. Fjöldi Vildarpunkta sem viðskiptavinur fær fyrir sína Stofnendurgreiðslu miðast við upphæð endurgreiðslu hvers og eins. Að auki fá viðskiptavinir sem velja endurgreiðslu í formi Vildarpunkta Icelandair sértilboð hjá Icelandair sem öðrum standa ekki til boða. 

„Icelandair Saga Club er stærsti vildarklúbbur landsins og markmið okkar er að gera hann að hluta af hversdeginum. Þegar viðskiptavinir Sjóvár velja að fá endurgreiðsluna sína í formi vildarpunkta breytist ár án tjóns í tækifæri til að upplifa heiminn. Þetta er nákvæmlega sú tegund samstarfs sem við leitumst eftir og fögnum því að hefja samstarf við eins virtan samstarfsaðila og Sjóvá,“ segir Tómas Ingason, framkvæmdastjóri tekju-, þjónustu- og markaðssviðs Icelandair.