Barnabílstólar og sessur

Enginn einn barnabílstóll er sá eini rétti eða sá besti. Það skiptir mestu máli að valinn sé barnabílstóll sem hentar stærð og þyngd barnsins, að stóllinn passi í bílinn og síðast en ekki síst að hann sé alltaf rétt festur. Við minnum á að viðskiptavinir í Stofni hjá Sjóvá fá 20% afslátt af nýjum barnabílstólum hjá Bílanaust og í versluninni Ólavía og Oliver.

Ungbarnabílstóll (frá fæðingu til 13 kg)

Hvernig á að velja barnabílstól

Þegar velja þarf barnabílstól er ekki nóg að horfa á tegundir eða útlit. Það eru nokkur grundvallaratriði sem þarf að huga að.

  • Stóllinn þarf að henta stærð og þyngd barnsins
  • Stólinn þarf að passa barninu og í bílinn
  • Ávallt þarf að tryggja að öryggisbúnaðurinn sé festur í bílinn í samræmi við leiðbeiningar framleiðanda.
  • Stóllinn þarf að uppfylla kröfur sem gerðar eru til barnabílstóla samkvæmt reglum ECE 44.04. eða i-Size R129

Það borgar sig að vanda valið þegar kemur að því að kaupa barnabílstól. Við minnum á að viðskiptavinir í Stofni hjá Sjóvá fá 20% afslátt af nýjum barnabílstólum hjá Bílanaust og í versluninni Ólavía og Oliver.

Bakvísandi barnabílstóll

Fyrsti bílstóllinn sem barnið þitt notar er oft kallaður ungbarnabílstóll. Eindregið er mælt með að barnið sé í bakvísandi bílstól eins lengi og hægt er, enda er það öruggast fyrir barnið.

Ástæðan er sú að höfuð barns yngra en 1 árs er hlutfallslega mjög þungt og hálsliðir barna yngri en 3 ára eru ekki fullþroskaðir og því viðkvæmir. Ef framendi ökutækis lendir í árekstri þá þrýstist háls og höfuð barns upp að baki bílstóls og ver þannig viðkvæma líkamsparta barnsins. Bakvísandi barnabílstóll takmarkar þannig höggið og hreyfinguna sem verður í kjölfar áreksturs. Með því að hafa barnið eins lengi og hægt er í bakvísandi bílstól dregur þú úr líkum á alvarlegum áverkum á höfði, hálsi og mænu í kjölfar umferðaróhapps.

Bakvísandi bílstóll í framsæti

Áður en bakvísandi barnabílstóll er staðsettur í framsæti bílsins þarf að láta aftengja öryggispúðann sem er fyrir framan sætið. Hafðu alltaf samband við fagaðila eða bílaumboð til þess að láta aftengja öryggispúðann.

Barnabílstóllinn festur í bílinn

Eitt mikilvægasta atriðið þegar kemur að barnabílstólum er að þeir séu rétt festir í bílinn. Besta ráðleggingin er að fara alltaf eftir leiðbeiningum framleiðenda til þess að tryggja að svo sé. Myndrænar leiðbeiningar eru á flestum barnabílstólum og svo er í mörgum tilfellum hægt að finna leiðbeiningar á heimasíðum seljanda eða framleiðenda.

ISOFIX festingar

Mörgum ungbarnabílstólum fylgir svokallað "base" sem hægt er að festa við ISOFIX festingu bílsins. Nýrri bílar og margar tegundir barnabílstóla eru með ISOFIX festingar. ISOFIX virkar þannig að griparmi aftan á barnabílstól er rennt í festingu í aftursæti þar sem báðar festingarnar læsast saman. ISOFIX festingar bíla og barnabílstóla eru mikil framför og hannaðar til að lágmarka líkur á að barnabílstólar séu rangt festir og auka þannig öryggi.

Ef ekki er ISOFIX festing í bílnum þínum en slík festing er á "base" barnabílstóls kannaðu þá í leiðbeiningum hvort hægt er að festa base-ið eingöngu með beltum bílsins. Ef það er ekki hægt fjarlægðu þá base-ið og festu þá stólinn samkvæmt leiðbeiningum framleiðenda.

Stilltu beltin í barnabílstólnum

Belti barnabílstólsins þurfa að liggja þétt að líkama barnsins til að það færist ekki til ef högg kemur á bílinn. Þetta er öryggisatriði sem vill oft gleymast. Það gæti því þurft að stilla belti barnabílstólsins í samræmi við klæðnað barnsins, þrengja eða víkka eftir því hversu þykk yfirhöfn þess er.

Barnabílstóll (9 til 25 kg)

Þegar barnið er orðið þyngra en hámarksþyngd ungbarnabílstólsins gefur upp er kominn tími til að skipta yfir í barnabílstól númer tvö.

Margir þessara barnabílstóla eru hannaðir þannig að þeir geta bæði snúið í bak- eða framvísandi akstursstefnu. Rétt er að ítreka að barnið er alltaf öruggara í bakvísandi barnabílstól og því er æskilegt að snúa því barnabílstólnum þannig eins og lengi og hægt er.

Ef staðsetja á bakvísandi barnabílstól í framsæti bílsins þarf alltaf að gera öryggispúða bílsins fyrir framan barnabílstólinn óvirkan. Fáðu aðstoð frá fagaðila til að tryggja að það sé gert rétt. Öryggispúðann þarf svo auðvitað að virkja aftur þegar fullorðinn einstaklingur notar sætið.

Bakvísandi barnabílstólar

Oft er spurt hvort ekki sé kominn tími til að snúa barnabílstólnum fram ef fætur barnsins eru bognir eða það þrengir að þeim. Rannsóknir sýna að það hefur ekki áhrif á öryggi barnsins og því er óhætt að hafa bílstólinn og barnið lengur í bakvísandi stöðu. Það er fyrst og fremst höfuð, háls og bak barnsins sem eru viðkvæmust. Til eru barnabílstólar sem eru hannaðir til að nota í bakvísandi þar til börn verða 25 kg á þyngd. Slíkir stólar eru festir með auka belti og stöng sem hvílir á gólfi bílsins. Þar með skapast auka rými fyrir fætur þar sem stóllinn nær út fyrir sæti bílsins.

Framvísandi barnabílstólar

Ekki er mælt með að barnabílstólum fyrir börn 9 til 25 kg sé snúið fram fyrr en þau hafa að lágmarki náð 1 árs aldri. Jafnframt er ekki hægt að mæla með að barnabílstól sé settur framvísandi í framsæti bílsins, jafnvel þó búið sé að gera öryggispúða bílsins óvirkan. Undantekningartilfelli gæti þó verið ef um er að ræða vinnubíl sem eingöngu er með framsæti. Ástæðan er sú að í framsæti er barnið staðsett á því svæði bílsins sem líklegast er að verða fyrir árekstri.

Belti barnabílstólsins

Vertu viss um að belti barnabílstólsins liggi þétt að líkama barnsins. Miðaðu við að ekki sé hægt að setja fleiri en þrjá fingur á milli beltis og barns. Gætið þess að barnið sé ekki í mjög þykkri yfirhöfn í bílnum. Rannsóknir hafa sýnt að ef börn eru í of þykkum fatnaði þá myndast bil á milli beltis og barns. Of laus belti geta orsakað áverka í kjölfar umferðaróhapps.

Bílsessur (18 til 36 kg)

Mælt er með að bílsessa með baki sé notuð eins lengi og hægt er eða þangað til að barnið hefur náð 36 kg. Barnabílstóllinn er þó alltaf öruggari og því best að börn noti barnabílstólinn sinn eins lengi og hámarks þyngd hans leyfir.

Bílsessur með baki auka öryggi barna og stuðla að því að belti bílsins liggi rétt á þeim, yfir öxl og mjaðmir. Þess vegna er afar mikilvægt að fresta því eins lengi og hægt er að nota eingöngu bílbelti fyrir barnið.

Bílsessa með baki

Eindregið er mælt með að notuð sé bílsessa með baki þar sem bakið á sessunni veitir barninu vörn fyrir höfuð, háls og hrygg. Öllu máli skiptir að belti bílsins liggi rétt á barninu þ.e.a.s. yfir öxl og mjaðmir og því er bílsessa með baki öruggari kostur en án baks. Á bílsessum með baki er oftast hægt að þræða beltinu í gegn til að stýra því yfir öxl barnsins og frá því að liggja yfir hálsinn. Neðri hluti bílbeltis á að liggja yfir læri barnsins og vera þrætt undir hakið sem er neðst á hliðum sessunar. Það tryggir að beltið liggi yfir mjaðmir en ekki kvið barnsins.

Bílsessa án baks

Hefðbundnar bílsessur án baks eru í raun sæti sem lyftir barninu upp í bílsætinu. Slíkur búnaður stýrir ekki bílbeltinu frá hálsi að öxl. Á sessunni sjálfri eru hök til að þræða bílbeltið í gegnum. Mikilvægt er að það sé alltaf gert, bæði til að bílbeltið liggi yfir mjaðmir og að bílsessan sé betur föst í bílnum. Í umferðaróhappi getur skapast hætta á að bílsessan renni undan barninu. Við slíkar aðstæður geta bílbeltin orsakað áverka af því þau liggja rangt á barninu. Þess vegna hafa bílsessur án baks oft hærri lágmarksþyngd en bílsessur með baki. Því hærra og þyngra sem barnið er því meiri líkur eru á að bílbeltið sitji rétt yfri öxl og mjöðm.

Algengar spurningar

Hvaða barnabílstóll er bestur?

Það skiptir mestu máli að valinn sé barnabílstóll sem hentar stærð og þyngd barnsins, að stóllinn passi í bílinn og síðast en ekki síst að hann sé alltaf rétt festur. Fylgdu ávallt leiðbein­ingum fram­leiðanda um hvernig festa á stólinn á réttan hátt.

Við mælum með að barnið sé tekið með þegar valinn er nýr barnabílstóll. Þá er hægt að finna út hvernig barnið passar í stólinn.

Passa allir barnabílstólar í alla bíla?

Nei. Bæði barnabílstólar og bílar eru mismunandi og því passa ekki allir stólar í allar gerðir bíla.

Paraðu saman tegund stóls og bíl

Margir framleiðendur og seljendur barnabílstóla bjóða upp á að paraðar séu saman tegundir barnabílstóla við árgerð og tegund bíla ("fit finder" eða "car fitting list") á heimasíðum sínum. Þannig er hægt að finna út hvaða barnabílstóll passar örugglega í þinn bíl.

Mátaðu stólinn í bílinn

Ef ekki er boðið upp á slíkt þá er eindregið mælt með að þú fáir lánað sýniseintak úr versluninni og mátir hann í bílinn þinn fyrir utan verslunina. Gættu þess að fylgja leiðbeiningum framleiðenda um hvernig á að festa stólinn á öruggan og réttan hátt. Þannig finnur þú fljótt út hvort hann passar vel í bílinn þinn.

ISOFIX festingar

Nýrri bílar og margar tegundir barnabílstóla eru með ISOFIX festingar. ISOFIX virkar þannig að griparmi aftan á barnabílstól er rennt í festingu í aftursæti þar sem báðar festingarnar læsast saman.

Hversu lengi á barnið að vera bakvísandi í bílnum?

Eins lengi og hægt er. Ekki er mælt með að barn yngra en 1 árs sé í framvísandi stöðu. Ástæðan er sú að höfuð barns yngra en 1 árs er hlutfallslega mjög þungt og hálsliðir barna yngri en 3 ára eru ekki fullþroskaðir og því viðkvæmir. Ef framendi bíls lendir í árekstri þá þrýstist háls og höfuð barns að baki bílstólsins og ver viðkvæma líkamsparta barnsins. Þannig minnka líkur á alvarlegum áverkum á höfuð, hálsi og mænu. Bakvísandi barnabílstóll takmarkar höggið og hreyfinguna sem verður í kjölfar áreksturs og því er öruggara að hafa barnið bakvísandi eins lengi og hægt er.

Ef fæturnir á barninu ná upp á sætisbakið, á ég að skipta um barnabílstól?

Nei ekki endilega. Rannsóknir hafa sýnt að það hefur ekki áhrif á öryggi barnsins þó svo að fæturnir á barninu nái upp á sætisbakið eða séu bognir, mestu máli skiptir að verja höfuð, háls og bak. Ef höfuð þeirra er komið upp fyrir efri brún barnabílstólsins en þau hafa ekki náð þeirri hámarksþyngd sem framleiðandi gefur upp fyrir stólinn þá er gott að miða við að efri brún stólsins sé ekki neðar en sem nemur miðju á eyru barnsins. Ef höfuð barnsins er komið ofar en það þá þarftu að skipta um stól til þess að tryggja að höfuð, háls og bak sé með góðan stuðning.

Má setja barn í framsæti ef öryggispúðinn er virkur þar?

Ef virkur öryggispúði er í mælaborði fyrir framan framsætið farþegamegin þá má aldrei setja barn í öryggisbúnaði þar. Börn verða að hafa náð 135 cm hæð til að geta setið í framsæti þar sem virkur öryggispúði er. Ástæðan er sú að lægri börn geta slasast alvarlega ef púðinn blæs út eftir umferðaróhapp.

Ef þú ætlar að festa bakvísandi öryggisbúnað fyrir börn í framsæti þá þarftu fyrst að aftengja öryggispúðann sem er fyrir framan framsætið. Hafðu samband við fagaðila eða bílaumboð ef þú ætlar að taka öryggispúðann úr sambandi.

Hver er endingartími barnabílstóla?

Það er mismunandi eftir því um hvaða gerð af barnabílstól er verið að ræða. Ungbarnabílstólar hafa fimm ára endingartíma. Barnabílstólar fyrir eldri börn s.s. barnabílstólar, sessur með baki og sessur hafa 10 ára endingartíma samkvæmt framleiðenda. Endingartíminn tekur mið af því ári sem búnaðurinn er fyrst tekinn í notkun (þ.e. þegar hann er fyrst tekin úr umbúðunum). Notaður barnabílstóll í geymslu telst vera í notkun.

Hvar get ég séð hvenær barnabílstóllinn var framleiddur?

Allir barnabílstólar eru með merkingu sem sýnir hvaða mánuð og ár barnabílstóllinn var framleiddur. Merkið er brætt í plastið og oftast er það staðsett annað hvort undir stólnum eða á bakinu. Oft eru tvær merkingar t.d. hringlaga klukkur með vísi. Önnur þeirra bendir á framleiðslumánuð og hinn framleiðsluárið. Hér má sjá mynd sem sýnir stól sem framleiddur var í apríl 2007.

Get ég notað barnabílstól frá Bandaríkjunum?

Nei, þann 1.júlí 2013 voru settar reglur sem bönnuðu innflutning, sölu og notkun Bandaríska barnabílstóla og bílpúða með baki (og sessur). Allur öryggisbúnaður fyrir börn í bílum á að uppfylla evrópskar kröfur eða ECE R44 04. Fram að þessu hefur ekki verið um að ræða sérstakt eftirlit til að taka stólana úr umferð og þessir stólar verða ekki innkallaðir. Foreldrum og forráðamönnum barna er hins vegar bent á að nota stólana þar til barnið vex upp úr honum eða þar til líftími hans rennur út. Þá á að farga honum í endurvinnslustöð. Athygli er vakin á því að bannið nær ekki eingöngu til kaupa og sölu heldur líka notkunar þannig að það gildir líka ef þú hefur fengið slíkan búnað gefins.

Get ég notað barnabílstól frá Bandaríkjunum ef bílinn er innfluttur beint frá Bandaríkjunum?

Ekki er mælt með að fólk kaupi FMVSS barnabílstól frá Bandaríkjunum jafnvel þótt það eigi bíl sem er framleiddur fyrir Bandaríkjamarkað en FMVSS er auðkenni fyrir Bandaríska barnabílstóla. Betra er að kaupa ECE R44 viðurkenndan barnabílstól sem er með ISOFIX festingu og festa hann við LATCH-lykkjur bílsins en slíkar festingar eru í Bandarískum bílum. Einnig er til öryggisbúnaður fyrir börn í bílum sem er bæði FMVSS viðurkenndur og ECE R 44 viðurkenndur.

Hvað er ECE R44?

Merkingin er auðkenni fyrir viðurkenndan öryggisbúnað fyrir börn í bíl. Allur öryggisbúnaður fyrir börn í bíl sem seldur er hér á landi á því að hafa þessa merkingu. ECE R44 er grunnmerkingin en 04 stendur fyrir hvaða útgáfu barnabílstóla staðalsins búnaðurinn uppfyllir. Þannig er 04 nýjasta útgáfa staðalsins (í gildi frá og með 01.07.2006).

Hér að neðan má sjá dæmi um merkingar á ECE R44 barnabílstólum og i-Size.

Hvað er i-Size?

Um er að ræða nýja löggjöf um barnabílstóla sem heitir i-Size ECE R129. Nýju reglurnar gilda samhliða núgildandi löggjöfum sem gilda um barnabílstóla hér á landi (ECE R44/04). Nýju i-Size barnabílstólarnir og reglur um þá miða að því að auka öryggi barna og að þau geti lengur snúið í bakvísandi akstursstefnu.

R44/04 i-Size
Árekstrarprófun: fram og aftur Árekstrarprófun: fram, aftur og hliðar
Barnabílstóll festist með bílbeltum eða ISOFIX Barnabílstóll festist eingöngu með ISOFIX
Krafa um að barn snúi bakvísandi að 13 kg Krafa um að barn snúi bakvísandi til 15 mánaða eða 105 cm
KG - Val byggir á þyngd barns SM/CM – Val byggir á hæð barns 

Er í lagi að kaupa eða fá lánaðan notaðan barnabílstól?

Ekki er mælt með að notaður öryggisbúnaður fyrir börn í bíl sé keyptur, lánaður eða leigður. Ástæðan er fyrst og fremst sú að ekki er hægt að vita með vissu hvort stóllinn hafi t.d. orðið fyrir höggi eða verið í bíl sem lenti í umferðaróhappi. Hér á landi gilda engar reglur um notaðan öryggisbúnað fyrir börn í bílum og það er ekki opinbert eftirlit með ástandi barnabílstóla í leigu eða seldir notaðir. Það er hins vegar ekki bannað að selja notaðan öryggisbúnað fyrir börn í bíla og því þurfa þeir sem kjósa að kaupa eða leigja notaðan öryggisbúnað að kanna eftirfarandi:

  • Passar stóllinn í bílinn
  • Hentar stóllinn hæð og þyngd barnsins
  • Hversu gamall er stóllinn
  • Hefur hann lent í tjóni eða umferðaróhappi
  • Fylgja leiðbeiningar framleiðenda um hvernig festa á stólinn rétt í bílinn
  • Hversu mörg börn hafa notað barnabílstólinn áður

Er barnabílstóll ónýtur ef hann hefur lent í árekstri?

Það er mjög erfitt að sjá eða vita hvort stóllinn sé laskaður og þar með ónothæfur. Það þarf ávallt að meta hvert tilfelli fyrir sig. Á Íslandi eru ekki opinberar reglur í gildi, en sænska umferðarstofan hefur gefið út leiðbeiningar um öryggisbúnað sem lent hefur í umferðaróhappi og sú viðmiðun hefur verið höfð til hliðsjónar hjá Sjóvá. Þær leiðbeiningar segja að ef bíllinn lendir í árekstri á litlum hraða við það eitt að vera að bakka í eða úr stæði þá sé barnabílstóllinn ekki ónýtur. Hins vegar, ef bíllinn lendir í harkalegum árekstri eða bílveltu er búnaðurinn mjög líklega ónýtur, jafnvel þó það sjáist ekkert á honum.

Er hægt að fá úttekt á ástandi barnabílstóls?

Nei, en mjög margar fyrirspurnir berast um hvort hægt sé að taka út ástand öryggisbúnaðar barna í bíl. Einfalda svarið er að það er ekki hægt að sjónskoða ástand þeirra eða fá úttekt á ástandi þeirra.

Má ég henda ónýtum barnabílstól í ruslið?

Það er lang best að fara með ónýtan barnabílstól og láta farga honum. Það er hægt er að fara með stólinn eða sessuna í næstu móttökustöð Sorpu og biðja um að honum sé fargað ekki settur í góða hirðinn. Þannig getur þú verið viss um að stóll sem runninn er út á endingartíma eða er skemmdur fari ekki aftur í notkun.

Hvers vegna er ekki mælt með að börn noti sessu án baks?

Sessur án baks eru ekki nægilega góður öryggisbúnaður. Í árekstri þá skapast hætta á að sessan renni undan þeim sem eykur líkur á áverkum undan bílbeltum þar sem það liggur á röngum stað á barninu. Þetta sýna bæði innlendar og erlendar rannsóknir. Því er eindregið mælt með að notuð sé sessa með baki.

Hvað þarf barnið að vera gamalt til þess að nota sessu?

Barn verður að vera orðið 15 kg til að geta notað sessu og öruggast er fyrir barnið að nota hana þangað til að það er orðið 12 ára eða 36 kg. Ef barnið er í barnabílstól sem er gerður fyrir 18 kg eða 25 kg, þá er best það noti þann búnað þangað til að það er vaxið upp úr honum.

Hvernig sessu með baki á ég að velja?

Best er að velja sessu með baki sem hefur hak við axlarhæð sem hægt er að þræða efrihluta 3 punkta beltisins. Það tryggir að bílbeltið liggi yfir öxlina en ekki upp að hálsinum. Neðri hluti beltisins á að liggja yfir læri barnsins og vera þrætt undir hakið sem er neðst á sessunni.

Hvenær má barnið nota eingöngu bílbelti?

Horfðu á hvernig beltið situr á barninu. Ef bílbeltið liggur yfir öxl barnsins og yfir mjaðmabein þá er barnið orðið nægilega hávaxið til þess að nota eingöngu bílbelti. Ef hins vegar öryggisbeltið liggur yfir háls eða kvið barnsins þá er það ekki orðið nægilega stórt til þess að nota eingöngu bílbelti. Ástæðan er sú að ef beltið liggur yfir háls eða kvið þá ver það ekki barnið rétt og eykur hættu á áverkum í kjölfar umferðaróhapps.

Hvernig kem ég 3 börnum fyrir í aftursætunum ef miðjubeltið er með 2 punkta belti?

Það fer eftir því hversu gömul börnin eru en öruggast er að hafa yngstu börnin í miðjusætinu því það eru til ungbarna- og barnabílstólar sem eru gerðir fyrir bæði 2 og 3 punkta bílbelti. Ef miðjusætið er kúpt, er mikilvægt að athuga hvort að barnabílstóllinn passi í sætið. Ekki er öruggt að hafa eldri börn (á eða án sessu) í 2 punkta belti.

Hvað er i-Size

Um er að ræða nýja löggjöf um barnabílstóla (i-Size ECE R129) sem gildir samhliða núgildandi löggjöf sem gerðar eru til barnabílstóla hér á landi (ECE R44/04).

Hvers vegna i-Size

Tilgangurinn er að auka öryggi barna í bílum með því að stuðla að því að þau sitji lengur í bakvísandi akstursstefnu. Því miður er það svo að börnum í bílum er of snemma snúið í framvísandi akstursstefnu. Framvísandi staða eykur á líkur á áverkum í kjölfar árekstrar eða umferðaróhappa. Ástæðan er sú að háls barns er ekki nægilega vel þroskaður til að styðja við þeirri sveigju sem þungt höfuð veldur. I-Size barnabílstólar eru hannaðir þannig að barnið getur notað þá lengur eða frá fæðingu að 15 mánaða aldri eða öllu heldur þeirri hæð sem framleiðandinn hannar stólinn fyrir. Áherslan er ekki ekki á aldur heldur hámarks hæð t.d. 83 cm.

Einnig stuðlar i-Size að því að barnabílstóllinn sé rétt festur í bílinn og að auðveldara sé að festa hann rétt. Þess vegna leggur i-Size áherslu á notkun isofix festinga þar sem isofix festingar barnabílstólsins festast beint í bílinn í stað þess að barnabílstólinn festist eingöngu með öryggisbeltum bílsins.

Barnshafandi í bíl

Líkt og aðrir í fullorðnir í bíl þá á barnshafandi kona ávallt að nota bílbelti. Gættu ávallt að því að beltið liggi vel yfir öxl og undir kúlunni eða yfir lærin. Þegar klæðst er þykkum fatnaði gættu þá að því að toga vel í beltið þannig að það liggi þétt upp að þér.

Barnshafandi sem ökumaður bíls

  • Færðu sætið aftur ef beltið er of stutt og ef þú átt í vandræðum með að spenna öryggisbeltið.
  • Gættu þess að færa sætið ekki svo langt aftur að þú náir ekki vel til pedala á gólfi.
  • Stilltu speglana upp á nýtt eftir að þú færir sætið þannig að þú sjáir vel út.
  • Ef þér tekst ekki að spenna beltið er þér ekki óhætt að keyra.

Barnshafandi sem farþegi í bíl

  • Þú getur setið í framsæti þrátt fyrir að það sé öryggispúði í mælaborði.
  • Stilltu sætið eins langt aftur og hægt er en gættu þess að beltið passi vel utan um þig.
  • Hafðu samband við bílaumboð bílsins til þess að kanna hvort hægt sé að fá lengri belti í bílinn. Margir nýrri bílar bjóða upp á slík. Mundu að öryggisbeltið er mikilvægt öryggistæki og því ber að fá aðstoð umboðsaðila bílsins.

Barnabílstólar í rútum og leigubílum

Börn í leigubílum og rútum

Það er jafn mikilvægt að huga að öryggisbúnaði barna í leigubílum og rútum eins og þegar ferðast er með einkabíl.

Öryggi barna í leigubílum Ef þú ert ekki með þinn eigin öryggisbúnað fyrir barnið þá er hægt að panta bíl með barnabílstól. Taktu fram hversu þungt barnið er þannig að leigubílinn komi með réttan búnað fyrir barnið. Skoðaðu vel hvort barnabílstóllinn sé festur í samræmi við leiðbeiningarnar á stólnum. Sumir leigubílar eru með innbyggða barnabílstóla í aftursætinu sem eru jafn öruggir og aðrir barnabílstólar og henta börnum frá 9 kg.

Öryggi barna í rútum

Flestar rútur eru eingöngu með tveggja punkta belti í sætum en það eru til rútur með þriggja punkta belti. Þegar svo er má einungis festa þar barnabílstól sem er gerður fyrir tveggja punkta belti. Til eru nokkrar tegundir af stólum sem hægt er að festa bæði með tveggja punkta og þriggja punkta beltum. Aldrei má festa öryggisbúnað í tveggja punkta belti ef hann er eingöngu gerður fyrir þriggja punkta belti því það skapar falskt öryggi. Í rútum sem eru með þriggja punkta belti á að festa barnið á sama hátt og það er fest í einkabílinn.

Barn sem er vant að nota sessu með eða án baks á ekki að nota sessu ef rútan er einungis með tveggja punkta belti. Ástæðan er sú að hætta er á að barnið geti kastast upp úr beltinu ef rútan lendir í árekstri eða veltu. Það er öruggara að barnið noti einungis tveggja punkta beltið í slíkum tilfellum.

SJ-WSEXTERNAL-3