Fr�ttir fr� Sj�v�

Forvarnir eru besta tryggingin

4.5.2012 15:55:16 GMT

Forvarnaviku starfsfólks og stjórnar Sjóvár lauk í dag. Í ár bar vikan yfirskriftina „Forvarnir eru besta tryggingin“ og vísaði hún til þess að þótt mikilvægt væri að vera vel tryggður sé ekki síður mikilvægt að gera fyrirbyggjandi ráðstafanir með það að markmiði að komast hjá tjóni, slysi eða óhappi.

Boðið var uppá fjölbreytta dagskrá með fyrirlestrum ýmissa samstarfsaðila Sjóvár og sérfræðinga á sviði öryggis- og forvarnamála auk þess sem starfsfólk mismunandi sviða fyrirtækisins fór yfir stöðu nokkurra málaflokka. Meðal annars var fjallað um góðan árangur Íslendinga af slysavörnum sjómanna, áhættusækni ökumanna í umferðinni og helstu tegundir tjóna hjá viðskiptavinum, bæði einstaklingum og fyrirtækjum. Í þessu samhengi var m.a. farið yfir tjónasögu starfsfólks Sjóvár. Efni fyrirlestranna er m.a. ætlað að gera starfsfólk Sjóvár enn betur í stakk búið til að miðla áhugaverðum og jafnvel brýnum upplýsingum til viðskiptavina félagsins.

Í lok forvarnavikunnar skuldbatt stjórn Sjóvár og starfsfólk sig til að vera öðrum fyrirmynd þegar kemur að forvörnum og öryggismálum. Skrifuðu allir undir sérstakan samning þess efnis fyrr í dag.

Meðfylgjandi myndir sýna starfsfólk skrifa undir áskorunina um að vera fyrirmynd í forvarnarmálum, á annari er stór hópur starfsfólks samankominn í blíðunni með nýundirskrifaða samninga við Sjóvá og enn önnur er af stjórn félagsins ásamt forstjóra.

Rafvespur – aukning tjóna og slysa

20.4.2012 11:33:46 GMT

Sjóvá vekur athygli á að mikil fjölgun hefur orðið á rafvespum í umferðinni og að greina má aukningu á slysum og tjónum vegna þeirra. Helstu notendur rafvespa eru unglingar sem ekki hafa fengið kennslu til þess að stjórna vélknúnum í umferðinni. Þess utan þá er litið á rafvespur sem leiktæki og því allt of algengt að ekki sé farið eftir umferðarreglum né hlífðarbúnaður notaður til dæmis hjálmar.

Rafvespur eru hannaðar fyrir allt að 25 km hraða hraða og eru flokkaðar sem reiðhjól samkvæmt Umferðarlögum en þyngd þeirra getur verið allt að 60 kg. Þetta eru því ökutæki sem eru þung og komast frekar hratt, sérstaklega ef ökumaður er óvanur. Rafvespur eru bæði notaðar á gang- og reiðhjólastígum sem og í almennri umferð og algengt er að farþegar séu á rafvespunum.

Hjólandi vorboðar

12.4.2012 15:45:54 GMT

Þeim sem hefur fjölgað sem kjósa að hjóla í vinnu eða skóla og gera má ráð fyrir að það aukist enn frekar þegar líða tekur á vor og sumar. Hafið í huga að hér á landi eru stígar oft þröngir og á þeim er oft mikil umferð. Á götum getur einnig verið mikil bílaumferð eða þeim lagt þannig að hjólandi þarf að fara út á miðja götu til þess að geta hjólað. Veldu því leið og hjólaðu í samræmi við aðstæður og taktu tillit til annarra notenda stíga.

Flest tjón og slys vegna reiðhjóla verða við þær aðstæður að hjólað var á miklum hraða með þeim afleiðingum að reiðhjólamaður kastaðist fram fyrir sig þegar hann hemlaði og féll. Samstuð hjólreiðamanna við aðra notendur göngu- og hjólreiðastíga er einnig algeng orsök tjóna og slysa.
Höfuðáverkar eru sem fyrr alvarlegustu reiðhjólaslysin. Sem fyrr eru reiðhjólahjálmar sá hlífðarbúnaður sem dregur úr líkum á alvarlegum höfuðáverkum. Notið því alltaf hjálm þegar þið hjólið.

Hvað þarft þú að hafa í huga?

Hjólaðu ávallt með hjálm, hvort sem vegalengdin er stutt eða löng.
Vertu í endurskinsfatnaði eða endurskinsvesti.
Farðu yfir reiðhjólið s.s. bremsur og dekk áður en þú byrjar að hjóla eftir veturinn.
Ef þú hjólar með tónlist eða útvarp í eyrunum vertu þá viss um að þú heyrir í umferðinni.
Hjólaðu á hjólreiða-og göngustígum þar sem þeir eru eða veldu umferðarminni götur.
Farðu eftir umferðarreglum og virtu rétt annarra stíganotenda.

Eldvarnir fyrirtækja – nýtt fræðsluefni

29.3.2012 15:17:42 GMT

Eldvarnir fyrirtækja og stofnana eru mikilvægar og reynslan hefur sýnt að ekki þarf að fara í kostnaðarsamar eða viðamiklar aðgerðir til þess að auka öryggi starfsfólks og koma í veg fyrir tjón. Góðar eldvarnir treysta rekstraröryggi fyrirtækis. Sjóvá hvetur fyrirtæki og stofnanir til þess að kynna sér fræðsluefni Eldvarnabandalagsins og innleiða eigið eldvarnareftirlit í fyrirtækjum. Jafnframt hvetur Sjóvá forráðamenn fyrirtækja til þess að nýta sér fræðsluefni Eldvarnabandalagsins til þess að auka skilning starfsfólks á mikilvægi eldvarna bæði í starfi og einkalífi.

Fréttatilkynning - Aðalfundur Sjóvár

27.3.2012 16:08:33 GMT

Afkoma í takti við áætlanir

Viðburðaríkt ár að baki þar sem nýir eigendur komu að félaginu.
Hagnaður ársins nam 642 m.kr.
Eigið fé 12.934 millj.kr í árslok.
Sérstök niðurfærsla á óefnislegum eignum að upphæð 1.624 m.kr.
Gjaldþolshlutfall móðurfélagsins styrktist um 54% á árinu.
Stefnt að skráningu í Kauphöll

Sjóvá og Slysavarnafélagið Landsbjörg endurnýja samstarfssamning

13.1.2012 12:13:44 GMT

- samstarfið aukið frá því sem verið hefur

Sjóvá og Slysavarnafélagið Landsbjörg hafa endurnýjað samstarfssamning, sem félögin hafa átt með sér frá stofnun Landsbjargar árið 1999. Sjóvá er sem kunnugt er aðalstyrktaraðili Slysavarnafélagsins Landsbjargar. Með þeim samningi, sem nú hefur verið gerður, verður samstarfið aukið frá því sem verið hefur, bæði á sviði forvarna og öryggismála. Nýi samningurinn byggir á góðri reynslu af fyrri samningum, en meðal nýlunda nú er aukin tryggingavernd í slysatryggingu björgunarfólks með það að markmiði að gæta enn betur að hagsmunum þeirra sem taka þátt í sjálfboðastarfi á vegum björgunarsveitanna.

Varist óþarfa vatnstjón

12.1.2012 23:15:17 GMT

Næstu daga mun hlýna á öllu landinu. Eftir langvarandi snjóa og frostakafla þurfa húsráðendur að gera ráðstafanir til þess að koma í veg fyrir vatnstjón. Hlýnandi veður eftir snjó og frostakafla þýðir að vatn safnast fyrir. Þegar það gerist verður að hreinsa frá niðurföllum svo þau geti tekið við vatninu. Flest tjón við þessar aðstæður má rekja til þess að ekki var mokað frá niðurföllum eða snjór ekki hreinsaður af þökum og svölum. Reynslan sýnir að allt of mörg vatnstjón hefði auðveldlega verið hægt að fyrirbyggja.

Þetta getur þú gert:

Viðvörun - Búist er við stormi víða um land

9.1.2012 08:51:23 GMT

Veðurstofan varar við stormi víða um land í kvöld. Við hvetjum fólk til þess að fylgjast með veðurfréttum. Einnig er hægt að skoða veðurspár og lýsingar á vef veðurstofunnar.

Varað er við hláku næstu daga

5.1.2012 15:42:57 GMT

Veðurstofan hefur sent frá sér aðvörun vegna rigningar næstu daga. Það er ekki að ástæðulausu þar sem nú er mikill snjór á jörðu og því rétt að huga að því hvort gera þurfi ráðstafanir. Þú getur kynnt þér betur hér að neðan hvað er gott að hafa í huga.
Þá er rétt að benda fólki á að búast má við miklum svellbunkum á götum og gangstéttum og því rétt að sýna sérstaka varúð í umferðinni og á það við um gangandi jafnt og akandi vegfarendur. Þar sem gangstéttir eru yfirfullar af snjó þurfa gangandi oft að ganga nærri götunni. Sjóvá hvetur fólk á öllum aldri til að nota endurskinsmerki. Mikilvægt er við þessar aðstæður að taka tillit til annarra og fara varlega.

Mokaðu frá niðurföllum og vertu viss um að þau séu ekki stífluð þar sem lauf, sandur og möl stíflar þau auðveldlega.
Fjarlægðu snjóhengjur og grýlukerti til að koma í veg fyrir að þau falli ofan á gangandi vegfarndur eða bíla með tilheyrandi slysa- og tjónahættu.
Hreinsið snjó frá hurðum og gluggum.
Mokið snjó af svölum en vertu viss um að slasa ekki gangandi vegfarendur eða moka á bíla sem lagt er upp við húsið.
Sumarhúsaeigendum er bent á að huga að vatnslögnum í bústöðum sínum. Þegar frost hefur verið í langan tíma er hætta á að vatn hafi frosið í leiðslum. Þegar snögglega hlýnar í veðri verður hætta á að vatn þenjist út og sprengi leiðslur með tilheyrandi vatnstjóni.
Eigendur húseigna sem ekki eru í notkun ættu jafnframt að huga að ástandi þeirra til að fyrirbyggja tjón.
Ef þú hyggur á ferðalög, kynntu þér veður og aðstæður til ferðalaga. Gakktu úr skugga um að ekki sé hætta á vatnsstjóni á meðan þú ert á ferðalagi.
Umsjónarmenn fasteigna og forvarsmenn fyrirtækja og stofnana þurfa einnig að huga að lofthitakerfum hjá sér. Í miklu frosti er hætt við að frjósi í hitablásurum í lofthitakerfum. Fyrir utan vatnstjón getur röskun á starfsemi orðið umtalsverð.

Sjá nánar upplýsingar um veður á vef Veðurstofunnar.

Barnatrygging tekur breytingum

30.12.2011 13:15:11 GMT

Sjóvá-Almennar líftryggingar hf. tóku nú um áramótin við vátryggingarstofni Barnatryggingar af Sjóvá-Almennum tryggingum hf.

Láttu ekki stela jólainnkaupunum

21.12.2011 11:05:37 GMT

Sjóvá minnir á að geyma ekki verðmæti í bifreiðum sem freista þjófa. Hvað getur þú gert til þess að koma í veg fyrir að brotist verði inn í bílinn þinn?

Geymið ekki verðmæti í bílum s.s. töskur, staðsetningartæki, fatnað eða innkaupapoka.
Ef það er óhjákvæmalegt settu þá poka og pinkla í skottið eða þar sem þeir sjást ekki inn um glugga bílsins.
Leggðu á bílastæði eða stað þar sem lýsing er góð.
Ef þú ætlar að geyma bílinn eða skilja eftir yfir nótt þá mælir Sjóvá með að lagt sé á vel upplýstu stæði.
Mundu að þjófar forðast mannfjölda og góða lýsingu.

Nánari upplýsingar eru einnig á vef Forvarnahússins.

Orkuveita Reykjavíkur semur við Sjóvá

19.12.2011 09:29:11 GMT

Í dag var undirritaður samstarfssamningur milli Orkuveitu Reykjavíkur og Sjóvá vegna vátrygginga Orkuveitunnar. Samningurinn er til þriggja ára og er undirritun hans í kjölfarið á útboði um vátryggingar Orkuveitunnar sem opnað var 2. desember.
Sérstaklega er horft til forvarnasamstarfs á milli Orkuveitunnar og Sjóvár enda leggja fyrirtækin mikla áherslu á forvarnir og öryggi í öllu sínu starfi.

Nánari upplýsingar veitir Pála Þórisdóttir, Sjóvá í síma 440-2000 og Ingi Jóhannes Erlingsson, OR í síma 516-6000

Á meðfylgjandi mynd frá vinstri eru: Ingi Jóhannes Erlingsson, áhættustýringu OR, Sveinn Segatta framkvæmdastjóri, sölu og ráðgjafasviðs Sjóvár, Ingvar Stefánsson framkvæmdastjóri Fjárhags hjá OR og Sigfús Sigurhjartarson viðskiptastjóri hjá Sjóvá.

Aðför að starfsfólki tryggingafélaga

15.12.2011 13:07:18 GMT

Í Morgunblaðinu í dag er birt yfirlýsing frá formanni VR og forstjórum íslensku tryggingafélaganna um fjársýsluskatt sem stendur til að leggja á allar launagreiðslur fjármálafyrirtækja.

Þar kemur fram að fyrirtækin hafa verulegar áhyggjur af þeim afleiðingum sem þessi skattur mun hafa í för með sér fyrir starfsfólk fyrirtækjanna og það sé sérstakt að yfirvöld ætli að skattleggja eina starfsstétt umfram aðrar í landinu.

Fréttatilkynninguna má lesa í heild sinni á mbl.is.

Sjóvá styður Geðhjálp

9.12.2011 18:03:35 GMT

Fimmtudaginn 8. desember sl. var hátíðarsamvera starfsmanna Sjóvár og fjölskyldna þeirra haldin í Háteigskirkju og er þetta er í fjórða sinn sem samveran er haldin. Söngsystur Sjóvá og Drengjakór félagsins buðu uppá lauflétta söngdagskrá með fallegum jólalögum. Sérstakur gestur í ár var Andrea Gylfadóttir söngkona, sem söng jólalög eins og henni einni er lagið.

Á samverustundinni hefur skapast hefð fyrir því að afhenda góðgerðar- eða líknarfélagi fjárstyrk sem nemur sparnaði Sjóvá við að senda eingöngu rafræn jólakort á viðskiptavini í stað jólakorta á pappír. Í ár var það Geðhjálp sem fékk framlagið og afhennti Hermann Björnsson forstjóri Björtu Ólafsdóttur formanni Geðhjálpar styrkinn.

Þess má geta að Sjóvá er eitt þeirra fyrirtækja sem tekur þátt í verkefninu Geðveik Jól 2011 sem er skemmtlegt verkefni sem Geðhjálp stendur að.

Á myndinni eru Víkingur Viðarsson frá Drengjakór Sjóvá, Björt Ólafsdóttir formaður Geðhjálpar og Hermann Björnsson forstjóri Sjóvá.

Komum í veg fyrir bruna af völdum kerta

7.12.2011 09:34:45 GMT

Markviss fræðsla hefur fækkað kertabrunum
Tölur sýna að fjöldi tilkynntra bruna vegna kerta eða kertaskreytinga frá árinu 2005 til nóvember 2011 hefur fækkað umtalsvert. Flestir kertabrunar verða í desember og því er ástæða til þess að minna enn og aftur á að fara varlega með lifandi ljós. Fræðsla um kerti og orsakir bruna vegna þeirra hefur skilað árangri ávallt þarf að vera á verði þegar lifandi ljós er notað.

Nýr framkvæmdastjóri hjá Sjóvá

1.12.2011 10:52:55 GMT

Sæmundur Sæmundsson hefur verið ráðinn framkvæmdastjóri Þjónustu- og rekstrarsviðs hjá Sjóvá-Almennum tryggingum. Sæmundur er tölvunarfræðingur að mennt og var síðastliðin 17 ár framkvæmdastjóri hjá Teris, auk þess sem hann hefur setið í ýmsum sérfræðinefndum á vegum fjármálafyrirtækja landsins.

Tilkynning um fyrirhugaðan flutning á vátryggingastofni

29.11.2011 16:17:55 GMT

Sjóvá-Almennar tryggingar hf. hefur sent umsókn til Fjármálaeftirlitsins þar sem óskað er eftir að félaginu verði veitt heimild til að flytja vátryggingastofn félagsins í barnatryggingum til Sjóvár-Almennra líftrygginga hf. Við flutning stofnsins mun Sjóvá-Almennar líftryggingar hf. yfirtaka öll réttindi og skyldur sem stofninum fylgja.

Stækkað þjónustusvæði Vegaaðstoðar

23.11.2011 16:50:21 GMT

Sjóvá og FÍB hafa unnið að stækkun á þjónustusvæði Vegaaðstoðar á undanförnum mánuðum. Það er ánægjulegt að greina frá því að nú getum við boðið Vegaaðstoð í flestum þéttbýliskjörnum landsins og nær þjónustan nú til rúmlega 90% landsmanna.

Þjónustukort Sjóvár

23.11.2011 16:38:05 GMT

Til hægðarauka fyrir viðskiptavini höfum við opnað Þjónustukort Sjóvár sem er samsett úr þremur kortum.

Minningarathöfn um fórnarlömb umferðaslysa

18.11.2011 14:15:05 GMT

Sameinuðu þjóðirnar hafa tileinkað þriðja sunnudag í nóvember ár hvert minningu fórnarlamba umferðaslysa. Af því tilefni hefur starfshópur innanríkisráðuneytisins um áratug aðgerða í umferðaröryggismálum hvatt landsmenn til þess að taka þátt í einnar mínútu þögn kl. 11:00 sunnudaginn 20. nóvember og minnast þeirra sem látið hafa lífið í umferðarslysum.

Nánari upplýsingar má sjá á vef Umferðastofu.